٠٣ سبتمبر ٢٠٠٨

حفل الإفطار الثقبوي


السلام عليكم أهل الثقب

حفل الإفطار السنوي بتاع الثقب هايكون يوم الأحد القادم ده على طول بإذن الله

أي عضو ثقبوي هايتخلف عن الحفل مش هايحصل له طيب وهاينظر في عضويته

رسم الإشتراك:
- عضو عزبنجي : الحضور ببلاش لوجه الله مكافأة له على رجولته وفطنته ودهائه اللي منعوه انه يقع في فخ الجواز
- عضو نص نص : وده العضو اللي كاتب كتابه او حتى خاطب وبناءً عليه هايجيب معاه كيسين شيبسي وعلبة عصير علشان مش هايبقى فاضي ياكل وهايقضيها موبايلات ورسايل لأن كلنا في الفترة دي بنبقى خاضعين لعملية كونترول ومتابعة ولابد من اثبات حسن السير والسلوك
- عضو لابس في الحيط : وده العضو اللي ربنا اكرمه آخر كرم واتجوز على اساس ان ربنا بيخلص منه في الدنيا علشان يدخله الجنة اللي بجد بإذن الله في الآخرة - لأن ربنا رحيم وما بيجمعش على حد شقائين - واستكمالاً لمنطومة الشقاء دي - اي عضو متجوز لازم يجب معاه فدية اطعام فرد او اتنين من الأعضاء العزبنجية جزاء ما قدمت يداه؛ وقد حدد فقهاء الثقب نصاب المشاركة للمتجوزين بكيلو لحمة او ما يعادل ذلك من الفراخ أو شوية محاشي على رز بالخلطة ويا ريت والدة غزلان اللي تعمله علشان مش ناقصين عك
- عضو اسمه مصطفى محمود: ده هايجيب الزند ؛ ولو مش هاييجي لا سمح الله يبعت الزند ويريح هو

مكان الإفطار : سيتم الإبلاغ بمكان الإفطار عن طريق رسائل مشفرة مراعاة لظروف الأعضاء الغلابة اللي لابسين في الحيط و
التسليم هايكون في بطن الزير؛ برجاء مراعاة السرية لأني شامم حركة مضادة من الزوجات وشكلهم كده والله أعلم عايزين يعملو افطار موازي لإفطار الثقب وبالمناسبة دي ما حدش يعرف مين ابن الـ (تيييييييييييت) اللي اخترع موضوع الإتحاد الحر والكيانات الموازية؟!
عموماً الثقب لسه بخير ولازم نفتح عينينا للمتربصين يا رجالة

القاهرة في ३ رمضان २००८ لأني ما عرفش الهجري بقى كام للأسف

١٧ فبراير ٢٠٠٨

عيب عليكم يا ثقباوية

عيب عليكم يا ثقباوية

فين صور جواز العضو غزاغيزو؟!! ده أطول عضو في الثقب

معقولة يمر مرور الكرام كده!! انا شايف الثقب اخلاقه اتغيرت । । وبعدين هو اكمنه مش عضو مؤسس ولا ايه

انا جاي اهدي النفوس يا رجالة

إسلام

٠٢ فبراير ٢٠٠٨

هاتجوز تا..تا...تا....هاتجوز



هاتجوز....او عشان اكون دقيق هاكتب كتابى.
و اهمية الحدث بالنسبة لى و لمن حولى مش لانه حدث سعيد او حاجة تفرحنى, و لكن الاهمية ترجع إلى تأخر هذا الحدث فى حياتى, لدرجة ان من حولى كان اصبح لديهم شبه يقين فى عدم حدوث هذا الحدث الهام و مع اقتراب وقوع الحدث ثارت جدلية بين اصدقائى....
فالبعض او الغالب سعيد و مشجع لى على هذه الخطوة و آثارها
و البعض حزين و يرى انها تعنى انهيار آخر رموز الصمود الرجولى امام المرأة حتى ان احدهم وصف فعلتى هذه بأنها الحماقة الاولى التى ارتكبها فى حياتى بعدما كنت رمزا للتعقل فى الامور....
و البعض ابتسم لى ابتسامة صفراء أخيرا وقعت يا بطل

و هناك مجموعة سعيدة جدا و هى مجموعة زوجات اصدقائى, فهن يشعرن ان الله قد استجاب لدعائهن أخيرا و ان سعيهن لتزويجى نجح اخيرا.. حتى و ان لم يكن عن طريقهن... فهذا الحدث يعطيهن الامل فى الاستقرار الاسرى و فى عودة ازواجهن الى منازلهم حيث انى متهم دائما بانى احرض اصدقائى على الخروج و السهر خارج البيت, مع انى مظلوم (مش قوى يعنى) لكن مع الاسف فأنا الشماعة اللى كل اصدقائى بيعلقوا عليها خروجهم و تزويغم من بيوتهم...
بغض النظر عن اللى فات و عن كل الآراء و كل النفسيات॥ انا بردو قررتانى اكتب كتابى و انا على رأى عبد السلام النابلسى (مغمض العين, مسدود الانف, اصم الاذن)........... و قصدى طبعا مغمض العين و الانف و الاذن عن كل المعوقات و عن اى حد يحاول ان يحبطى او يرينى عيوب الزواج (باحاول اصلح)॥
هاتجوز لأن دى رغبة اهلى (والدى و والدتى).. و انا بصراحة نفسى ارحمهم من قلقهم المستمر عليا و رغبتهم فى الاطمئنان و احساسهم باتمام رسالتهم.
و هاتجوز استجابة لنصائح اخوانى فى الله اللى كتيير نصحونى باهمية الزواج و كتير ذكرونى بقول المصطفى _صلى الله عليه و سلم_ (يا معشر الشباب من استطاع منكم الباءة فليتزوج)هاكتب كتابى استجابة لضغوط اصدقائى على من اجل ان تتساوى الرؤوس... و كمان عشان زوجات اصدقائى يرتاحوا و يعرفوا ان مش انا السبب..
هاتجوز كمان طمعا فى رزق الله لأن رسولنا الكريم قال ابتغوا الرزق فى النكاح, و طلبا فى عون الله فالنبى يقول ثلاث حق على الله عونهم, منهم الناكح يريد العفاف..هاتجوز و اكتب كتابى, استجابة لسنة الله الكونية فى قوله ((و من آياته ان خلق لكم من انفسكم ازواجا لتسكنوا اليها و جعل بينكم مودة و رحمة ان فى ذلك لآيات لقوم يتفكرون))هاتجوز و اكتب كتابى لانى وجدت و رزقنى الله بأسرة كريمة فخور بأن اناسبها و انتمى لها.. اسرة اجد افرادها كلهم و اب و ام لم اجد منهم غر حسن المعاملة و كرم الاخلاق..هاتجوز و اكتب كتابى لأن اهم سبب و اكبر دافع و هو انى وجدت الانسانة المناسبة ووجدت فيها كل ما اتمناه و بصراحة قلبى دقلها...هاكتب كتابى يوم الاحد القادم 2008/2/3 الساعة 3 فى قاعة الصفا بدار الارقم بمكرم عبيد بمدينة نصر....فشاركونى فى اهم حدث فى حياتى



منقول من مدونة القصاص للجميع




تتقدم الجمعية العمومية والمكتب السياسى التهييسى والجناح العسكرى لكتائب "عز الدين القصاص" وجميع عناصرها وأعضائها العاملون والمنتسبون المقيمون والمسافرون, تتقدم بالتهنئة وإطلاق الزغاريط فى الجو والصواريخ فى السماء وتفريق الكفتة والطرب على الحاضرين والغائبين ابتهاجا بإقدام القائد الأعلى و المرشد العام والملهم والمؤسس الأول للحركة(اللى هى بركة)على دخول القفص الذهبى(اللى ماعرفش مين اللى ذهّبه) وإذ نتقدم بهذه المناسبة العطرة للحاج محمد القصاص وعروسته إيمان بأخلص التهانى والأمنيات بحياة زوجية سعيدة ومليئة بالحمل والولادة والمتابعة عند الدكتور(أوالدكتورة)والسونار والعيال والبامبرز والسيريلاك والعياط والصريخ والمدارس والدروس وتربية العيال والاقساط وهدوم العيدوالتموين وإيجار الشقة والمية والنور...و....و......ووو

وفبارك الله لكما وبارك عليكما وجمع بينكما فى خير

.........واشرب يا حلوووووووووووو
مصطفى

٢٤ يناير ٢٠٠٨

العضو الأول في الجيل الثاني للثقب الأسود

خاص - وكالات أنباء - الثقب الأسود




استجابة لدعوة عضو مجلس القيادة القطرية المعلم كواكبيني

أنشر صورة العضو الأول في الجيل الثاني للثقب الأسود

الأستاذ التنك : تقي الله سامح البرقي

وطبعا اللي يشوفه يقول ماشاء الله لا قوة إلا بالله

١٤ يناير ٢٠٠٨

ثقباوي تحت السن



ثقباويون تحت السن

كل العموهات - جمع عمو - اللي في الثقب الأسود بترحب بالسيد/ أدم محمود الدرجلي عضو - بس مش زي اي عضو لأنه صغير - جديد في الجيل الثاني للثقب اللي بيتكون من:


  1. السيد توكتوك البرقي
  2. السيد دودو زينهم
  3. السيد لولي صافي محمود
  4. السيد باخ البرقي
  5. السيد زوز صافي محمود
  6. السيد عمار عمو سيكا
  7. السيد عمر زينهم
  8. السيد علي البرقي الشهير باللمبي
  9. الأنسة فرح زينهم
  10. السيد البراء هاني
  11. السيد أنس هاني
  12. الأنسة إسراء فايز
  13. الأنسة جنة عمو سيكا
  14. الأنسة جود فايز
  15. الأنسة زاد فايز
  16. السيد عمر باسم التوربيني
  17. أدم محمود أبو صلاح ابن الناظر

تقريباً ده الحصر اللي تحت ايدي وده تحت العجز والزيادة لأني مش ضامن اذا كان حد متجوز عرفي و مخلف ولا لأ


عموماً على كل السادة الثقباوية يبعتوا صور عيالهم وهانبدأ بصورة النجم الجديد


آدم محمود الدرجلي

١٢ يناير ٢٠٠٨

محمود صلاح جاب آآآآآآآآآآآدم يا رجااالة


إدارة الثقب الأسود وجميع لجانه الرئيسية و الفرعية وكل عشاق التهييس يتقدمون إلى العضو العامل (عامل إيه مش عارف) محمود صلاح بخالص التهانى على المولود الجديد آدم (وطبعا مش لازم نقوللكو إنه ولد أظن باين من الاسم ) ونهتف جميعا من قلوبنا موجهين التهنئة لأخينا ( إوعى الأسماء الخمسة ) و ف بق وااااحد
بورك لك فى الموهوب
وشكرت الواهب
ورزقت بره
وبلغ أشده
أما بالنسبة للهدايا والنقوط وماشابه فبالتحويل على حساب الثقب فى بنوك سويسرا والأرقام معروفة طبعا

أما بالنسبة لموضوع البامبرز يا أستاذ محمود فأنا عايزك كل مايجيلك قرشين نقوط تروح تشتريلك عبوة بامبرز حجم عائلى علشان حاجتين أولا : إن سعره دايما فى الطالع
ثانيا : إن ها يبقى موقف محرج موت لو مراتك قالتلك إن عبوة البامبرز فاضل فيها واحدة فهاتلنا عبوة كبييييرة وانت جاى من الشغل يا حودة وانت فى هذا الوقت مفلسسسسسسسس

صدقنى ساعتها هاتندم أشد الندم على الجواز واللى عايزينه والخلفة واللى بيخلفوها
وكما قال الشاعر
القرش لبيض ينفع فى اليوم اللى الواد بطنه سايبة فيه

أخوك


دى حاجة بسيطة بس للتذكرة يابو صلاح يابن الناظر

٣٠ ديسمبر ٢٠٠٧

حين مسخرة





حين مسخرة


هذا الشبل من ذاك الــ...هنمشيها الأسد

٢٧ ديسمبر ٢٠٠٧

أبو راااامى


أبو رامى
طعم ووزن للكيلو ماحصلش لكن خدمة ...زبالة
فلو انت من اللى بيفرق معاك موضوع الخدمة والمعاملةوالكلام الفارغ ده خليك بكرامتك واوعى تعدى من قدامه



المكان : المدبح القديم,أمام مستشفى السرطان الجديد ومسجد الرواس ..بتاع الشيخ رجب الله يباركله

المأكولات : هما تلت أربع أنواع لحوم مافيش غيرهم ,كباب وكفتة ونيفة وموزة ,وبالمناسبة ممنوع تطلب عنده كباب لوحده وبيحط مع الكباب والكفتة سجق كده غلاسة وهو ده النظام ...وهتضرب

الأسعار : آخر مرة قبل مايجدد كان بـ 90 جنيه الكيلو والموزة هتطلع بـ 40 جنيه تقريبا
لكن عنده اختراع كده سندوتش كفتة بـ 10 جنيه بس جامد جدا ومليان ومعاه علبتين سلطة و كمان تاخده "تيك أواى" يبقى استفدت بالأكل وما قعدتش و تلقيت خدمة أقل ما يقال عنها إنها نموذج لاستعباد الإنسان المصرى لأخيه اللى هو الإنسان المصرى برضه


نبذة مختصرة عن المطعم

بص بقه... أبو رامى ده يجمع مابين متناقضات فظيعة جدا
أولا أميز حاجة عنده إن وزن الكيلو تحس إنه كيلو ونص من بتاع أى كبابجى تانى خلقه ربنا وده يثبتلك إنه أكيد أبو رامى مش بيعشق جمالنا فى الضلمة وبيمسى على كل واحد يخش عنده ويطلب كيلو كباب وكفتة بنص كيلو تحية من جيبه اللى تلاقيه هايفرقع من كتر الفلوس ..ليه ده تلاقيه فرقع فعلا و من زماااان كمان
ده طبعا يثبتلك إن الكبابجية التانيين بيشتغلوا الناس أعظم اشتغالة فى التاريخ المصرى الحديث واحن اللى كنا فاكرين إن الكيلو عندهم بخيره لكن فضحهم عم ابو رامى
أما عن الطعم فى أبو رامى فماقوللكش ..أصلى

نيجى بقة لكارثة أبو رامى وهى الخدمة والمعاملة ...يا سيدى
كل اللى عند أبو رامى من أول رامى سخصيا لحد أصغر عيل هناك مشتركين فى نفس الصفات

مكشرين فى وشك متواصل
مالهمش فى أبسط مبادئ الخدمة والضيافة
تنادى عليه يجيلك بعد أسبوعين ده إذا جه
ييجى جايبلك الحساب وهو كاتبه على ضهر ورقة كرتونة معفنة م الشارع وهو عايز يقوللك هاتدفع وهاتضرب وياعينى لو فكرت تناقشه فى الحساب تبقى ليلة ....طين
شكلهم وحش ولبسهم وحش ولابسين شباشب وبنفس اللبس م السنة للسنة

والله يا جماعة أنا مرة ناديت على رامى ده وقلتله

هو انتو ليه بتعاملوا الناس كدة؟ أنا المفروض إنى جاى آكل فى محل كباب وكفتة يعنى هادفعلى متين تلتميت جنيه أنا واللى معايا يعنى لازم أتعامل معاملة كويسة
تخيلوا رد علية وقاللى ايه

قاللى : وإيه يعنى يابيه ميتين تلتميت جنيه؟

فمن ساعتها وانا عرفت إن المحل ده "هوبلس كيس" لأن إذا كانت ده وجهة نظر رامى إنك ما تستحقش تتعامل عدل إذا مافيش أمل

وإلى اللقاء فى مطاعم أخرى
منتظر تعليقاتكو

مصطفى

٢٣ ديسمبر ٢٠٠٧

قائمة مطاعم الثقب الأسود المعتمدة

قائمة مطاعم الثقب الأسود
بث تجريبى

بالمناسبة ده مش هاوهاو ده صورة أنا جايبها من عالنت

هاو هاو
الشهير بـ عم رزق الكبابجى


العنوان:ش ماعرفش اسمه على ناصيته حلوانى متفرع من ش الشيخ ريحان فى عابدين
المأكولات:المفروض إنه كبابجى بس كل اللى بيروحله بياكل كفتة وطرب جملى هو مبدئيا بيقول إنها جملى إنما الحقيقة إيه ماحدش يعرفها إلا اللى خلقنا وخلق الكلاب والحمير والقطط.....إلخ .
ننصح بـ:رغيف كفتة بـ 3 جنية يحتوى على 3أسياخ كفتة ,رغيف طرب بـ 4 جنيه يحتوى على 4 صوابع طرب إنما إيييييييه (مُكن) دة بالعيش والسلطات يعنى الإجمالى 7 جنيه وجبة تمام تقوم بعدها (عنتشر زمانك) وماتنساش جنيه "التبس" للواد اللى تحس أنك تموت وتحميه بإيدك فى مية مغلية لعل وعسى إنه ينضف.
طبعا إوعى تسوللك نفسك وتعيش فى دور إبن الناس وتهوب ناحية اللحمة اللى بيقول إنها ضانى عشان ساعتها هاتكون زى اللى رقصوا عالسلم لو عايز تاكل كباب وكفتة بجد استنة وانا هاظبطك كمان شوية.
نبذة مختصرة عن المحل

هاو هاو دة بقى تاريخ طويل
أول مرة دخلت فيها المحل ده وأكلت فيه كان من سنين طويلة ومن يومها وانا ماتخيلش بنى آدم أنا أعرفه ماودتهوش هناك من اصحاب وزمايل وأهلى أما هو فراجل الله يمسيه بالخير زى العسل وبيحبنا لأننا عشرة عمر وبنفكره بأيام الخير وولاده همه اللى ماسكين المحل بداله دالوقت।



نرحب باقتراحاتكم


مصطفى

يالهوى عليك يا قصاص لما تقفش



يالهوى عليك ياقصاص لما تقفش



فعلا هو اللى خلانى أقول صدق اللى قال "اتق شر الحليم إذا غضب" آه والله
قصاص شخصية حبوبة موت بيحب كل الناس وكل الناس بتحبه إنما لما يقفش أجااااااارك الله بيبقى واحد تانى خااااالص بس ربك والحق بيبقى شكله كوميدى موت لأنه مش لايق عليه النرفزة وبيبقى عامل زى الأطفال الصغيرين.
أحكيلكوا الموضوع من أوله
كنا مع بعض تالت يوم العيد بالليل عالقهوة ومتفقين اننا هنتقابل 11 الصبح عشان نروح عقيقة إبن باسم ...بيييس؟
الصبح فضل هانى يصحينى بالتليفونات ماصحتش طبعا لغاية مالقيته عندى فالبيت وصحانى
أنا طبعا نايم 6 ونص الصبح وصاحى زورى مقفول وعندى بوادر أنفلونزا وتعبان موت فبعد مداولات مع هانى وياسر"سيكا"فى التليفون قلت لهانى خد عربيتى وروحوبيها وانا هاحصلكوا مع ياسر و مراتاتنا(اللى همة زوجاتنا ولا مؤاخذة) طبعا أنا هه باشهدكوا همة كانوا عاملين حسابهم على عربيتى مع عربية محمود ناخد الناس معانا وانا عدانى العيب وقزح لما قلت لهانى خد عربيتى روحوا بيها وانا أصلا مابحبش أدى عربيتى لحد إنما عشان الاتفاق اللى مابيننا قلتلهم كدة يبقى أناعدانى العيب وقزح ولا لأ ......قزح يا معلم
الحاج قصاص عرف إنى ماصحيتش لسة ولما صحيت بافاوض هانى إنى آجى ولا لأ ولو هاجى هاحصلهم بعد شوية أو أى حاجة غير اللى اتفقنا عليه
يالـاااااهوى على الزربنة اللى اتزربنها ..زعيق وزعل وقفش علية واكلمه عالموبايل مايردش علية بقى و تجيبه يمين تجيبه شمال مافيش أى تفاهم وقصاص لما بيقفش مايعرقش أبوه
وده كانت أول قفشة اليوم بعد كدة اتحول لمجموعة من القفشات مابين قصاص وكل اللى تسولله نفسه الأمارة بالسوء إنه ييجى ناحية قصاص أو يختلف معاه فى حاجة شوية مع سولى وشوية مع حسن وغيرهم .
الحمد لله على آخر اليوم كل الخلافات دابت ورجعت المياه لمجاريها

وتوتة توتة خلصت الحدوتة حلوة ولا ملتوتة؟؟؟؟


مصطفى

١٧ ديسمبر ٢٠٠٧

تهنئة وعتاب


مدونة شلة الثقب الأسود تهنئ أعضاءها الكرام والأمة الإسلامية بأسرها بعيد الأضحى المبارك .....وكل عام وأنتم بخير

ونذكر الأعضاء الكرام بعقيقة الأستاذ \ عمر أفندى نجل العضو باسم التوربينى (الشهير بـ باسم الشربينى) رابع يوم عيد الأضحى المبارك


ومش ممكن بقى يا جماعة التنفيض اللى انتوا منفضينه للمدونة ده
بقى أنا (أمءء - أمقق -­ أمأأ - أمءأ ...وانتوا اختارولكوا واحدة منهم) عينية فى الكتابة عشان أعملكوا زخم إعلامى و ثقافى ثقبوى وانتوا ولا انتوا هنا ..لازم أكتبلكوا كلام كبير ومجعلص يعنى عشان تعبروها؟

ماااااااااااااااشى

تاءاااات المستقبل ولولميات المرحلة القادمة
الإصلاح ..الإصلاح.. يا إما تجيبولنا صلاح ..أو انشراح
العولمة والأسلمة والزنئرة فى غياب المضمون
اليمين واليسار واللى فوق واللى تحت وهيييييييه حبة فوق وحبة تحت

هااا...أظن مافيش كلام أكبر من كده, جيبتلكوا كل الكلام الكبير

ياللا أدخلوا بقى واطحنوا فى الجدل الفكرى بتاعكوا احتمال تكون فتحة خير عالمدونة ونلاقيلها زباين.

مصطفى

١٥ ديسمبر ٢٠٠٧

هام وعاجل


هام وعاجل


السادة الثقباوية الكرام؛ اسعد الله صباحكم

اسرة الإذاعة المدرسية تحييكم وتتمنى لكم يوماً دراسياً موفقاً

ثم أما بعد


الحقيقة ان "العضو" اللي زيه زي أي عضو المدعو "صافي" أثار نقطة هامة وهي عقيقة ابن باسم التوربيني ويا ريت الموضوع ده يتحسم قبل العيد: هل العقيقة دي هاتأثر سلباً على حفلة الشوي السنوية اللي بنعملها في العيد كل سنة ولا لأ

اتمنى ان خططنا تبقى محكمة ومرنة في نفس الوقت بما لا يدع مجالاً للتاثر بالأحداث الطارئة من عينة ان حد خلف او اتجوز اوحتى خطب

والله الموفق وهو من وراء القصد ويهدي السبيل

بسم الله واستعنا عالشقا بالله




بسم الله واستعنا عالشقا بالله


بقى المدونة ده من ساعة ما اتفتحت ماحدش عبرها بتدوينة إلا التدوينة اليتيمة بتاعة إسلام (سولى...وهابقى أقوللكوا على إسم الدلع بتاع كل واحد فى الشلة لما تيجى سيرته حكم أنا بحب أدلع أسدكائى موووت) المهم من بعدها وانا نفسى أكتب فيها بس كنت شوية ماعاييش الباسوورد وشوية أكسل إنما لما لقيت إن احنا على أعتاب العيد الجامد بتاع اللحمة الجامدة وعلى أعتاب فعاليات مهمة وتاريخية (هاقوللكوا عليها بعد شوية) قلت مابدهاش ياد اتوكل على الله وابدأ والمهم إن ده أول مرة أتعامل فيها مع المدونات دانا حتى باكسل أكتب تعليقات فى مدونات الشباب أصحاب الرؤى والأفكار الزنقورية الإصلاحية الشديدة اللى وللأسف بعض منهم أعضاء فى "الثقب الأسود" وفاقعين أهلى بالكلام الكبير اللى بيقعدوا يقولوه إنما حسيت بواجب وطنى ومسؤولية أدبية إنى آخد زمام المبادرة (يانهار اسوح عالكلام الكبير نضحوا علية ولاد اللذينة) ورحت للأخ "البرقوقى" وعلمنى ازاى أعمل "ساين إن" (معلش كل ما باكتبها بالإنجليزى الكتابة بتبوظ ) واكتب فى المدونة।



وإليكم الفعاليات الهامة

أول فعالية تاريخية ومفصلية وفيصلية برضه هى





تكوين اتحاد الثقب الحر من زوجات شلة الثقب الأسود

التفاصيل

  • لقيت مراتى بتقوللى

  • احنا اتفقنا نجمع زوجات الثقب وهانفطر يوم الاتنين هنا في البيت

    من نفسكوا كدة؟

  • أيوة اشمعنا انتو

  • ومين بقى صاحب الفكرة العظيمة ده؟

  • مرات إسلام
  • ومين اللى هاييجى؟

  • كلللللهم

  • يابنت اللذينة وعرفتوا تجمعوهم كلهم؟

  • أيوة

  • وخطيبة قصاص؟
  • أيوة

  • الله دانتوا ناويين لنا على نية بقى؟ ...........(صمت)

    أما بقيت التفاصيل فلقيتها مش عايزة تقولهالى أوى يظهر إنهم عايزين يشعروا بالاستقلالية والـ... الـ...الـ...حاجة كدة مش عارف اسمها ايه.
    وطبعا إنهم يقدروا يجمعوا كل الزوجات ده حاجة غريبة جدا لأن زوجاتنا مختلفين نوعا ما فى حاجات كتير فده معناها إنهم مركزين.
    المهم يا معلم ربك والحق أنا قلقت وطبعا كل اللى أقوللـه من أفراد الثقب يقلق زيي ويقعد يسألنى همه ناويين على إيه........إوعى يكون هايعملوا إتحاد الثقب الحر... دول جايبين خطيبة قصاص كمان يانهار اسوح من أولها...
    طبعا الرجالة مقتنعة بمنطق (فرق تسُد) ولأن عشان مش كل زوجات الثقب أصدقاء فكان الرجالة بيعرفوا يظبطوا أمورهم إنما المسألة كده هاتكون أصعب كتير وبينى وبينك هى برضه ليها شوية مميزات।





الفعالية الأهم

قصاص هايكتب كتابه يا رجاله

طبعا الموضوع ده عايزله تدوينة لأ قول تدوينات إنما هانذكره دالوقتى عالسريع لغاية ما نرجعله بعد كدة بالبحث والتنقيب والتحليل (دم ولا بول ...ها ها ها ..وحشة موووت)
المهم إن الأب الروحى لشلة الثقب الأسود هايتجوز ويطب فى الخية وهايدخل برجليه القفص اللى بيقولوا عليه ذهبى (مش عارف مين اللى ذهّبه) وطبعا ده حدث تنظروا الأمة بأسرها ونحن إذ نتقدم بخالص و أرق التعاز...التهانى لأخينا وملهمنا الروحى القصاص (كاتر) على هذه الخطوة التى طالما انتظرتها جماهير المنتخــ....جماهير الثقب الموحد الأعظم وسمعنى سلام العظيم سعد الصغير فى راعئته الخالدة
"أنا خلاص هاتجوز وابطل اقضيها اشتغالات ....هاتجوز...هاتجوز"

وعظيمة يا ....صفط




الفعالية الثالثة
"باسم التوربينى" الشهير بـ "باسم الشربينى" عازمنا

على عقيقة إبنه فى العيد فى المنصورة


عرفت من يومين إن باسم جاى مصر وعازمنا فى العيد على عقيقة إبنه (يا بتوع العربى هى كلمة "إبن" همزة وصل ولا قطع يعنى بتتكتب ولا لأ؟؟)فى المنصورة وده الحقيقة بتبقى فرصة عظيمة لكذا حاجة طبعا أكلة جامدة وتغب فيها حتى الثمالة من غير ماحد يقوللك تلت التلاتة كام ,ثانيا صحبة حلوة يوم كامل وتهييس بقى ايه ما اقوللكش,ثالثا وده الأهم نتحصل على ثواب إجابة الدعوة يا أخى فى الله ان شاء الله
وبهذه المناسبة الميمونة نتقدم للعضو التوربينى (اللى واخد تفرغ من الثقب لظروف سفره من كام شهر) بخالص التهانى وبأرق الـ..أي حاجة ودعائنا جميعا للخروف اللى هانطحن أهله إن شاء الله بحلاوة لحمته وزيادة وزنه وبالصبر والسلوان والسلام عليكم.



انتظروا قريبا
مسايقة أفضل" لوجو" للثقب الأسود

الثقب الأسود كيف ولماذا؟

بالمناسبة هوليه "أسود"!!؟؟؟
قهوة "أبو أمين" شاهد على العصر

أرجوزة ...قصة على الطريق الصحراوى.
بلبع فى القلب
لماذا اختفى الأهوجى "على علبة" ولمذا عادأهى المؤامرة أم المصادفة..؟
حكايتنا مع السينما
الإسكندرية... حكاية عشق
تمن سودانى وتمن لب أبيض وتمن لب سوبر بسررررعة
القصااااااص...... للجميييييع
دليل الثقب الأسود للمطاعم المعتمدة رسميا بالقاهرة والإسكتدرية

سلسلة محاضرات "أدبيات الثقب الأسود"


بالمناسبة اللى عايز فيكوا يكتب فى موضوع من دول ياخد من العبد الفقير المدوناتى الجامد أو من "سولى" الباسوورد ويتفضل ينزل أرض المعركة ويورينى نفسه وفارس لفارس وكى بورد لكي بورد بس لو حد سولتله نفسه الأمارة بالسوء أو إبليس اللعين إنه يحذف كلمة م اللى أنا كاتبهاهاعوره مفهوم يا ثقب ؟ ...مفهوم ؟ أيوة كدة افتكرت।آل أرجوزة آل



إلى اللقاء فى التدوينة الجاية أراكم فى التعليقات.



مصطفى

٢٠ سبتمبر ٢٠٠٧

بث تجريبي للثقب الأسود

بث تجريبي لمدونة الثقب الأسود

الإفطار السنوي للثقب الأسود
يتشرف مجلس قيادة الثقب الأسود - القيادة القطرية - بدعوة كل الإخوة الثقباوية لحضور حفل الإفطار السنوي والذي يعقد هذا العام على شرف صحة الرئيس وانه طلع زي الفل وابتهاجاً بحبس اربع رؤساء تحرير مرة واحدة واستغلالاً لفرصة ان افطار الاخوان السنوي اتلغى لما يشكله من تهديد للأمن الغذائي المصري وهو ما سيعطي لإفطار الثقب الأسود زخماً إعلامياً وسياسياً قوياً
حفل الإفطار سيحضره ممثلون من شتى انحاء القطر المصري من أسوان جنوباً وحتى الاسكندرية شمالاً مروراً بمناطق امبابة والبدرشين والصف وحلوان وشبرا ومصر الجديدة والمهندسين والعجوزة والشيخ زايد وأكتوبر والهرم وفيصل وعابدين وهو ما سينجم عنه بعض الاختناقات المرورية على رأي المقدم أحمد عاصم بتاع البرنامج الشهير صباح الخير يا ثقب
الحضور بدعوات تليفونية. . يعني مش أي واحد معدي سمع ان فيه فطار يرمي الهلب وييجي يخنقنا