03 سبتمبر 2008

حفل الإفطار الثقبوي


السلام عليكم أهل الثقب

حفل الإفطار السنوي بتاع الثقب هايكون يوم الأحد القادم ده على طول بإذن الله

أي عضو ثقبوي هايتخلف عن الحفل مش هايحصل له طيب وهاينظر في عضويته

رسم الإشتراك:
- عضو عزبنجي : الحضور ببلاش لوجه الله مكافأة له على رجولته وفطنته ودهائه اللي منعوه انه يقع في فخ الجواز
- عضو نص نص : وده العضو اللي كاتب كتابه او حتى خاطب وبناءً عليه هايجيب معاه كيسين شيبسي وعلبة عصير علشان مش هايبقى فاضي ياكل وهايقضيها موبايلات ورسايل لأن كلنا في الفترة دي بنبقى خاضعين لعملية كونترول ومتابعة ولابد من اثبات حسن السير والسلوك
- عضو لابس في الحيط : وده العضو اللي ربنا اكرمه آخر كرم واتجوز على اساس ان ربنا بيخلص منه في الدنيا علشان يدخله الجنة اللي بجد بإذن الله في الآخرة - لأن ربنا رحيم وما بيجمعش على حد شقائين - واستكمالاً لمنطومة الشقاء دي - اي عضو متجوز لازم يجب معاه فدية اطعام فرد او اتنين من الأعضاء العزبنجية جزاء ما قدمت يداه؛ وقد حدد فقهاء الثقب نصاب المشاركة للمتجوزين بكيلو لحمة او ما يعادل ذلك من الفراخ أو شوية محاشي على رز بالخلطة ويا ريت والدة غزلان اللي تعمله علشان مش ناقصين عك
- عضو اسمه مصطفى محمود: ده هايجيب الزند ؛ ولو مش هاييجي لا سمح الله يبعت الزند ويريح هو

مكان الإفطار : سيتم الإبلاغ بمكان الإفطار عن طريق رسائل مشفرة مراعاة لظروف الأعضاء الغلابة اللي لابسين في الحيط و
التسليم هايكون في بطن الزير؛ برجاء مراعاة السرية لأني شامم حركة مضادة من الزوجات وشكلهم كده والله أعلم عايزين يعملو افطار موازي لإفطار الثقب وبالمناسبة دي ما حدش يعرف مين ابن الـ (تيييييييييييت) اللي اخترع موضوع الإتحاد الحر والكيانات الموازية؟!
عموماً الثقب لسه بخير ولازم نفتح عينينا للمتربصين يا رجالة

القاهرة في ३ رمضان २००८ لأني ما عرفش الهجري بقى كام للأسف

هناك تعليقان (2):

salah يقول...

يا جماعة الثقب الكرام,كل عام وانتم بخير والعاقبة فى المسرات دايما..
الدعوة الكريمة دى يجب ان تجد الآذان الصاغية بتاعة زمان التى كانت تسمع الهيعة فتأتى مهرولة ولا يلومها لومة لائم ولكنى اوصى بالتغيير هذا العام ان يكون الطبق الرئيس هو خروف كامل مستوى عند مرجعيتنا الأكلية والفكرية أخونا وموجه بطوننا الأخ الركن الشيف حفظه الله ورعاه.
وأنا خدامكم لأنى أعرف واحد ممكن يوفرلنا خروف على وجه السرعة وبسعر جيد جدا جدا .والأمر لكم ونحسبكم أهل الحصافة والعلم والحلم فانظروا ماذا تأمرون.

الكواكبي يقول...

الرأي ما رأى أبا أدم الدرجلي . . فلنفطر على كبش أملح كأسلافنا من صناديد الكفار
بس لا مؤاخذة الخروف ده على حساب مين