٢٣ ديسمبر ٢٠٠٧

يالهوى عليك يا قصاص لما تقفش



يالهوى عليك ياقصاص لما تقفش



فعلا هو اللى خلانى أقول صدق اللى قال "اتق شر الحليم إذا غضب" آه والله
قصاص شخصية حبوبة موت بيحب كل الناس وكل الناس بتحبه إنما لما يقفش أجااااااارك الله بيبقى واحد تانى خااااالص بس ربك والحق بيبقى شكله كوميدى موت لأنه مش لايق عليه النرفزة وبيبقى عامل زى الأطفال الصغيرين.
أحكيلكوا الموضوع من أوله
كنا مع بعض تالت يوم العيد بالليل عالقهوة ومتفقين اننا هنتقابل 11 الصبح عشان نروح عقيقة إبن باسم ...بيييس؟
الصبح فضل هانى يصحينى بالتليفونات ماصحتش طبعا لغاية مالقيته عندى فالبيت وصحانى
أنا طبعا نايم 6 ونص الصبح وصاحى زورى مقفول وعندى بوادر أنفلونزا وتعبان موت فبعد مداولات مع هانى وياسر"سيكا"فى التليفون قلت لهانى خد عربيتى وروحوبيها وانا هاحصلكوا مع ياسر و مراتاتنا(اللى همة زوجاتنا ولا مؤاخذة) طبعا أنا هه باشهدكوا همة كانوا عاملين حسابهم على عربيتى مع عربية محمود ناخد الناس معانا وانا عدانى العيب وقزح لما قلت لهانى خد عربيتى روحوا بيها وانا أصلا مابحبش أدى عربيتى لحد إنما عشان الاتفاق اللى مابيننا قلتلهم كدة يبقى أناعدانى العيب وقزح ولا لأ ......قزح يا معلم
الحاج قصاص عرف إنى ماصحيتش لسة ولما صحيت بافاوض هانى إنى آجى ولا لأ ولو هاجى هاحصلهم بعد شوية أو أى حاجة غير اللى اتفقنا عليه
يالـاااااهوى على الزربنة اللى اتزربنها ..زعيق وزعل وقفش علية واكلمه عالموبايل مايردش علية بقى و تجيبه يمين تجيبه شمال مافيش أى تفاهم وقصاص لما بيقفش مايعرقش أبوه
وده كانت أول قفشة اليوم بعد كدة اتحول لمجموعة من القفشات مابين قصاص وكل اللى تسولله نفسه الأمارة بالسوء إنه ييجى ناحية قصاص أو يختلف معاه فى حاجة شوية مع سولى وشوية مع حسن وغيرهم .
الحمد لله على آخر اليوم كل الخلافات دابت ورجعت المياه لمجاريها

وتوتة توتة خلصت الحدوتة حلوة ولا ملتوتة؟؟؟؟


مصطفى

هناك ٥ تعليقات:

أحمد عبد العاطي يقول...

ملتوته
مش علشان انت مبتعرفش تكتب وتحكي
بس عشان احنا بنحب قصاص وعاذرينه في نوادر نرفزته
وربنا يهدي الجميع لما يحب ويرضي
ولي مع الثقب وقفات

الكواكبي يقول...

ايه يا عم اللغة البيئة دي
يا لهوي على مدونة الثقب . . انه لعارٌ وشنار
شكلي هاسحب منك الباسوورد يا نجم النجوم

شلة الثقب الأسود يقول...

وبعدين يا نجم ما ابوالقصاقيص ما غرهوش انه القائد العام لكتائب عز الدين القصاص - على رأي مجدي ايام زمان- واعتذر للجميع
وبما انه اعتذر فانا رأيي انه ما ينفعش نرجع نتكلم في الموضوع تاني لأن ده مش من اخلاق الثقب اللي طبعاً متعلمينها من الإخوان اللي هما جايبينها من آداب الإسلام
ثانياً قلنا اللي عايز يكتب يبقى يكتب في مواضيع عامة . . وان شاء الله ربنا ما يجيبش مشاكل
العواف عليكو

غير معرف يقول...

أبو درش حكي عن قصاص واللي عمله معاه يوم الرحلة وهو ده فعلا اللي حصل بس عشان حق الرد يبقي موجود وبما أن درش وعد بأنه هيكتب عن قضايا الفساد في الثقب فلازم تكون أمين في نقل الحدث عشان المصداقية يا عم مصطفي

بصراحة انت عملت فينا مقلب كالعادة واحنا كنا قاعدين ليلتها تقريبا كنا هنبوس إيدك عشان متبعتناش ومتصحاش الصبح تقول أنا تعبان ومش هاقدر أجي

وفضلنا نأكد أن عدد 10 ولازم تكون موجود بالعربية عشان نعرف نروح وطبعا بما إنك رجل ليلي ولا تتعايش مع الكائنات اللي بتصح الصبح بدري اللي هو 10 و11 صباحا يعني فدائما لما بناخد معاد الصبح في غير يوم الجمعة بتبقي النتيجة معروفة أن انت تعبان وبتعتذر
ومعلش ياصحبي قصاص فوضني عشان انقل رأيه فيك وفي اللي عملته يوميها .

شلة الثقب الأسود يقول...

قصاااااااااااااااااص

أجدع


نااااااااااااااااااس

مصطفى