٢٧ ديسمبر ٢٠٠٧

أبو راااامى


أبو رامى
طعم ووزن للكيلو ماحصلش لكن خدمة ...زبالة
فلو انت من اللى بيفرق معاك موضوع الخدمة والمعاملةوالكلام الفارغ ده خليك بكرامتك واوعى تعدى من قدامه



المكان : المدبح القديم,أمام مستشفى السرطان الجديد ومسجد الرواس ..بتاع الشيخ رجب الله يباركله

المأكولات : هما تلت أربع أنواع لحوم مافيش غيرهم ,كباب وكفتة ونيفة وموزة ,وبالمناسبة ممنوع تطلب عنده كباب لوحده وبيحط مع الكباب والكفتة سجق كده غلاسة وهو ده النظام ...وهتضرب

الأسعار : آخر مرة قبل مايجدد كان بـ 90 جنيه الكيلو والموزة هتطلع بـ 40 جنيه تقريبا
لكن عنده اختراع كده سندوتش كفتة بـ 10 جنيه بس جامد جدا ومليان ومعاه علبتين سلطة و كمان تاخده "تيك أواى" يبقى استفدت بالأكل وما قعدتش و تلقيت خدمة أقل ما يقال عنها إنها نموذج لاستعباد الإنسان المصرى لأخيه اللى هو الإنسان المصرى برضه


نبذة مختصرة عن المطعم

بص بقه... أبو رامى ده يجمع مابين متناقضات فظيعة جدا
أولا أميز حاجة عنده إن وزن الكيلو تحس إنه كيلو ونص من بتاع أى كبابجى تانى خلقه ربنا وده يثبتلك إنه أكيد أبو رامى مش بيعشق جمالنا فى الضلمة وبيمسى على كل واحد يخش عنده ويطلب كيلو كباب وكفتة بنص كيلو تحية من جيبه اللى تلاقيه هايفرقع من كتر الفلوس ..ليه ده تلاقيه فرقع فعلا و من زماااان كمان
ده طبعا يثبتلك إن الكبابجية التانيين بيشتغلوا الناس أعظم اشتغالة فى التاريخ المصرى الحديث واحن اللى كنا فاكرين إن الكيلو عندهم بخيره لكن فضحهم عم ابو رامى
أما عن الطعم فى أبو رامى فماقوللكش ..أصلى

نيجى بقة لكارثة أبو رامى وهى الخدمة والمعاملة ...يا سيدى
كل اللى عند أبو رامى من أول رامى سخصيا لحد أصغر عيل هناك مشتركين فى نفس الصفات

مكشرين فى وشك متواصل
مالهمش فى أبسط مبادئ الخدمة والضيافة
تنادى عليه يجيلك بعد أسبوعين ده إذا جه
ييجى جايبلك الحساب وهو كاتبه على ضهر ورقة كرتونة معفنة م الشارع وهو عايز يقوللك هاتدفع وهاتضرب وياعينى لو فكرت تناقشه فى الحساب تبقى ليلة ....طين
شكلهم وحش ولبسهم وحش ولابسين شباشب وبنفس اللبس م السنة للسنة

والله يا جماعة أنا مرة ناديت على رامى ده وقلتله

هو انتو ليه بتعاملوا الناس كدة؟ أنا المفروض إنى جاى آكل فى محل كباب وكفتة يعنى هادفعلى متين تلتميت جنيه أنا واللى معايا يعنى لازم أتعامل معاملة كويسة
تخيلوا رد علية وقاللى ايه

قاللى : وإيه يعنى يابيه ميتين تلتميت جنيه؟

فمن ساعتها وانا عرفت إن المحل ده "هوبلس كيس" لأن إذا كانت ده وجهة نظر رامى إنك ما تستحقش تتعامل عدل إذا مافيش أمل

وإلى اللقاء فى مطاعم أخرى
منتظر تعليقاتكو

مصطفى

هناك ٦ تعليقات:

غير معرف يقول...

طيب وليه تظن ان هو مبيغشش ومتظنش ان لحمته مش تمام ... مش يمكن لحمة حمير ولا حاجة .. ولابيدخل ضمن اللحمة حاجات تزودها

لكم الله يا ثقب من الى اانتو بتاكلوه ده

mostafa mahmud يقول...

أولا ..من المتحدث؟؟؟؟؟

من الرجل ؟؟؟

من أى قبيلة؟؟؟

ثانيا

عيب أوى إن نحن الثقب الأسود نتغش فى اللحمة

إحنا لما بناكل لحم كلاب بنكون عارفين وبناكلها بمزاجنا
ومابندفعش فيها 90 جنيه فى الكيلو

فضلا ,راجع تدوينة "هاو هاو" السابقة

مصطفى

أحمد عبد العاطي يقول...

أنا فعلا مبسوط وأنا باقرأ كلامك يا أخ مصطفي بس أرجو إنه يكون لا يأخذ منك وقت لأنه فعلا ممكن يدخل في باب اللهو المباح لو لم يكن يستغرق وقت
ومن حبي لك ولباقي الشلة أرجو أن تعدد النوايا بما تراه وتثير قضايا هامة أيضا فلغتك وخفة ظلك تناسب الكثيرين وشكرا علي لطفك وسعة صدرك

الكواكبي يقول...

يا جماعة ابو رامي ايه!! انا مش فاكر ان الثقب عمره راح ناحية ابو رامي غير علشان نصلي ورا الشيخ رجب في الرواس
مصطفى بي بيقدم دليل للي عايز ياكل انما احنا من الشعب والى الشعب . . والمحل اللي يبيع كيلو الكفتة ازيد من 60جنيه بنقاطعه
من الآخر . . احنا بتوع المتلج

إخوانى مخربش يقول...

ابو رامى ايه حضرتك

لما تحب تاكل كباب وكفته وطرب و طواجن ماحصلتش فى التاريخ

بدل ما تروح عند ابورامى فى المدبح روح عند ابن حميدو

وابن حميدو ده حضرتك هتلاقيه فى شارع السيدة بين موقف ابو الريش وجامع السيدة هتلاقيه على الشمال وانتا رايح ناحية المسجد

لما تجربه ابقى اول هو ولا ابو رامى التعبان بتاعكم ده

ال ثقب اسود ال

Ahmed El-Agouz يقول...

والله يا اخي فتحت نفسي وسدتها في نفس الوقن بجد احنا شعب ضايع اعتقد ان المحل ده بيعامل اللحمة اللي بيجبها ويفرمها ويولع فيها ويشويها علي الفحم احسن من الزبائن
واللي مش عاجبه يسبه من فكرة انه بني ادم ويحاول يكون خروف ولا بقرة يمكن يفلح
واتمني ان نتواصل علي المدونة دائما وتشرفني علي مدونتي المتواضعة
http://a-agouz.blogspot.com/