حين مسخرة

حين مسخرة

هذا الشبل من ذاك الــ...هنمشيها الأسد

أبو راااامى

أبو رامى
طعم ووزن للكيلو ماحصلش لكن خدمة ...زبالة
فلو انت من اللى بيفرق معاك موضوع الخدمة والمعاملةوالكلام الفارغ ده خليك بكرامتك واوعى تعدى من قدامه

المكان : المدبح القديم,أمام مستشفى السرطان الجديد ومسجد الرواس ..بتاع الشيخ رجب الله يباركله

المأكولات : هما تلت أربع أنواع لحوم مافيش غيرهم ,كباب وكفتة ونيفة وموزة ,وبالمناسبة ممنوع تطلب عنده كباب لوحده وبيحط مع الكباب والكفتة سجق كده غلاسة وهو ده النظام ...وهتضرب

الأسعار : آخر مرة قبل مايجدد كان بـ 90 جنيه الكيلو والموزة هتطلع بـ 40 جنيه تقريبا
لكن عنده اختراع كده سندوتش كفتة بـ 10 جنيه بس جامد جدا ومليان ومعاه علبتين سلطة و كمان تاخده "تيك أواى" يبقى استفدت بالأكل وما قعدتش و تلقيت خدمة أقل ما يقال عنها إنها نموذج لاستعباد الإنسان المصرى لأخيه اللى هو الإنسان المصرى برضه


نبذة مختصرة عن المطعم

بص بقه... أبو رامى ده يجمع مابين متناقضات فظيعة جدا
أولا أميز حاجة عنده إن وزن الكيلو تحس إنه كيلو ونص من بتاع أى كبابجى تانى خلقه ربنا وده يثبتلك إنه أكيد أبو رامى مش بيعشق جمالنا فى الضلمة وبيمسى على كل واحد يخش عنده ويطلب كيلو كباب وكفتة بنص كيلو تحية من جيبه اللى تلاقيه هايفرقع من كتر الفلوس ..ليه ده تلاقيه فرقع فعلا و من زماااان كمان
ده طبعا يثبتلك إن الكبابجية التانيين بيشتغلوا الناس أعظم اشتغالة فى التاريخ المصرى الحديث واحن اللى كنا فاكرين إن الكيلو عندهم بخيره لكن فضحهم عم ابو رامى
أما عن الطعم فى أبو رامى فماقوللكش ..أصلى

نيجى بقة لكارثة أبو رامى وهى الخدمة والمعاملة ...يا سيدى
كل اللى عند أبو رامى من أول رامى سخصيا لحد أصغر عيل هناك مشتركين فى نفس الصفات

مكشرين فى وشك متواصل
مالهمش فى أبسط مبادئ الخدمة والضيافة
تنادى عليه يجيلك بعد أسبوعين ده إذا جه
ييجى جايبلك الحساب وهو كاتبه على ضهر ورقة كرتونة معفنة م الشارع وهو عايز يقوللك هاتدفع وهاتضرب وياعينى لو فكرت تناقشه فى الحساب تبقى ليلة ....طين
شكلهم وحش ولبسهم وحش ولابسين شباشب وبنفس اللبس م السنة للسنة

والله يا جماعة أنا مرة ناديت على رامى ده وقلتله

هو انتو ليه بتعاملوا الناس كدة؟ أنا المفروض إنى جاى آكل فى محل كباب وكفتة يعنى هادفعلى متين تلتميت جنيه أنا واللى معايا يعنى لازم أتعامل معاملة كويسة
تخيلوا رد علية وقاللى ايه

قاللى : وإيه يعنى يابيه ميتين تلتميت جنيه؟

فمن ساعتها وانا عرفت إن المحل ده "هوبلس كيس" لأن إذا كانت ده وجهة نظر رامى إنك ما تستحقش تتعامل عدل إذا مافيش أمل

وإلى اللقاء فى مطاعم أخرى
منتظر تعليقاتكو

مصطفى

قائمة مطاعم الثقب الأسود المعتمدة

قائمة مطاعم الثقب الأسود
بث تجريبى

بالمناسبة ده مش هاوهاو ده صورة أنا جايبها من عالنت

هاو هاو
الشهير بـ عم رزق الكبابجى

العنوان:ش ماعرفش اسمه على ناصيته حلوانى متفرع من ش الشيخ ريحان فى عابدين
المأكولات:المفروض إنه كبابجى بس كل اللى بيروحله بياكل كفتة وطرب جملى هو مبدئيا بيقول إنها جملى إنما الحقيقة إيه ماحدش يعرفها إلا اللى خلقنا وخلق الكلاب والحمير والقطط.....إلخ .
ننصح بـ:رغيف كفتة بـ 3 جنية يحتوى على 3أسياخ كفتة ,رغيف طرب بـ 4 جنيه يحتوى على 4 صوابع طرب إنما إيييييييه (مُكن) دة بالعيش والسلطات يعنى الإجمالى 7 جنيه وجبة تمام تقوم بعدها (عنتشر زمانك) وماتنساش جنيه "التبس" للواد اللى تحس أنك تموت وتحميه بإيدك فى مية مغلية لعل وعسى إنه ينضف.
طبعا إوعى تسوللك نفسك وتعيش فى دور إبن الناس وتهوب ناحية اللحمة اللى بيقول إنها ضانى عشان ساعتها هاتكون زى اللى رقصوا عالسلم لو عايز تاكل كباب وكفتة بجد استنة وانا هاظبطك كمان شوية.
نبذة مختصرة عن المحل

هاو هاو دة بقى تاريخ طويل
أول مرة دخلت فيها المحل ده وأكلت فيه كان من سنين طويلة ومن يومها وانا ماتخيلش بنى آدم أنا أعرفه ماودتهوش هناك من اصحاب وزمايل وأهلى أما هو فراجل الله يمسيه بالخير زى العسل وبيحبنا لأننا عشرة عمر وبنفكره بأيام الخير وولاده همه اللى ماسكين المحل بداله دالوقت।

نرحب باقتراحاتكم

مصطفى

يالهوى عليك يا قصاص لما تقفش

يالهوى عليك ياقصاص لما تقفش

فعلا هو اللى خلانى أقول صدق اللى قال "اتق شر الحليم إذا غضب" آه والله
قصاص شخصية حبوبة موت بيحب كل الناس وكل الناس بتحبه إنما لما يقفش أجااااااارك الله بيبقى واحد تانى خااااالص بس ربك والحق بيبقى شكله كوميدى موت لأنه مش لايق عليه النرفزة وبيبقى عامل زى الأطفال الصغيرين.
أحكيلكوا الموضوع من أوله
كنا مع بعض تالت يوم العيد بالليل عالقهوة ومتفقين اننا هنتقابل 11 الصبح عشان نروح عقيقة إبن باسم ...بيييس؟
الصبح فضل هانى يصحينى بالتليفونات ماصحتش طبعا لغاية مالقيته عندى فالبيت وصحانى
أنا طبعا نايم 6 ونص الصبح وصاحى زورى مقفول وعندى بوادر أنفلونزا وتعبان موت فبعد مداولات مع هانى وياسر"سيكا"فى التليفون قلت لهانى خد عربيتى وروحوبيها وانا هاحصلكوا مع ياسر و مراتاتنا(اللى همة زوجاتنا ولا مؤاخذة) طبعا أنا هه باشهدكوا همة كانوا عاملين حسابهم على عربيتى مع عربية محمود ناخد الناس معانا وانا عدانى العيب وقزح لما قلت لهانى خد عربيتى روحوا بيها وانا أصلا مابحبش أدى عربيتى لحد إنما عشان الاتفاق اللى مابيننا قلتلهم كدة يبقى أناعدانى العيب وقزح ولا لأ ......قزح يا معلم
الحاج قصاص عرف إنى ماصحيتش لسة ولما صحيت بافاوض هانى إنى آجى ولا لأ ولو هاجى هاحصلهم بعد شوية أو أى حاجة غير اللى اتفقنا عليه
يالـاااااهوى على الزربنة اللى اتزربنها ..زعيق وزعل وقفش علية واكلمه عالموبايل مايردش علية بقى و تجيبه يمين تجيبه شمال مافيش أى تفاهم وقصاص لما بيقفش مايعرقش أبوه
وده كانت أول قفشة اليوم بعد كدة اتحول لمجموعة من القفشات مابين قصاص وكل اللى تسولله نفسه الأمارة بالسوء إنه ييجى ناحية قصاص أو يختلف معاه فى حاجة شوية مع سولى وشوية مع حسن وغيرهم .
الحمد لله على آخر اليوم كل الخلافات دابت ورجعت المياه لمجاريها

وتوتة توتة خلصت الحدوتة حلوة ولا ملتوتة؟؟؟؟

مصطفى

تهنئة وعتاب

مدونة شلة الثقب الأسود تهنئ أعضاءها الكرام والأمة الإسلامية بأسرها بعيد الأضحى المبارك .....وكل عام وأنتم بخير

ونذكر الأعضاء الكرام بعقيقة الأستاذ \ عمر أفندى نجل العضو باسم التوربينى (الشهير بـ باسم الشربينى) رابع يوم عيد الأضحى المبارك

ومش ممكن بقى يا جماعة التنفيض اللى انتوا منفضينه للمدونة ده
بقى أنا (أمءء - أمقق -­ أمأأ - أمءأ ...وانتوا اختارولكوا واحدة منهم) عينية فى الكتابة عشان أعملكوا زخم إعلامى و ثقافى ثقبوى وانتوا ولا انتوا هنا ..لازم أكتبلكوا كلام كبير ومجعلص يعنى عشان تعبروها؟

ماااااااااااااااشى

تاءاااات المستقبل ولولميات المرحلة القادمة
الإصلاح ..الإصلاح.. يا إما تجيبولنا صلاح ..أو انشراح
العولمة والأسلمة والزنئرة فى غياب المضمون
اليمين واليسار واللى فوق واللى تحت وهيييييييه حبة فوق وحبة تحت

هااا...أظن مافيش كلام أكبر من كده, جيبتلكوا كل الكلام الكبير

ياللا أدخلوا بقى واطحنوا فى الجدل الفكرى بتاعكوا احتمال تكون فتحة خير عالمدونة ونلاقيلها زباين.

مصطفى

هام وعاجل

هام وعاجل

السادة الثقباوية الكرام؛ اسعد الله صباحكم

اسرة الإذاعة المدرسية تحييكم وتتمنى لكم يوماً دراسياً موفقاً

ثم أما بعد

الحقيقة ان "العضو" اللي زيه زي أي عضو المدعو "صافي" أثار نقطة هامة وهي عقيقة ابن باسم التوربيني ويا ريت الموضوع ده يتحسم قبل العيد: هل العقيقة دي هاتأثر سلباً على حفلة الشوي السنوية اللي بنعملها في العيد كل سنة ولا لأ

اتمنى ان خططنا تبقى محكمة ومرنة في نفس الوقت بما لا يدع مجالاً للتاثر بالأحداث الطارئة من عينة ان حد خلف او اتجوز اوحتى خطب

والله الموفق وهو من وراء القصد ويهدي السبيل

بسم الله واستعنا عالشقا بالله

بسم الله واستعنا عالشقا بالله

بقى المدونة ده من ساعة ما اتفتحت ماحدش عبرها بتدوينة إلا التدوينة اليتيمة بتاعة إسلام (سولى...وهابقى أقوللكوا على إسم الدلع بتاع كل واحد فى الشلة لما تيجى سيرته حكم أنا بحب أدلع أسدكائى موووت) المهم من بعدها وانا نفسى أكتب فيها بس كنت شوية ماعاييش الباسوورد وشوية أكسل إنما لما لقيت إن احنا على أعتاب العيد الجامد بتاع اللحمة الجامدة وعلى أعتاب فعاليات مهمة وتاريخية (هاقوللكوا عليها بعد شوية) قلت مابدهاش ياد اتوكل على الله وابدأ والمهم إن ده أول مرة أتعامل فيها مع المدونات دانا حتى باكسل أكتب تعليقات فى مدونات الشباب أصحاب الرؤى والأفكار الزنقورية الإصلاحية الشديدة اللى وللأسف بعض منهم أعضاء فى "الثقب الأسود" وفاقعين أهلى بالكلام الكبير اللى بيقعدوا يقولوه إنما حسيت بواجب وطنى ومسؤولية أدبية إنى آخد زمام المبادرة (يانهار اسوح عالكلام الكبير نضحوا علية ولاد اللذينة) ورحت للأخ "البرقوقى" وعلمنى ازاى أعمل "ساين إن" (معلش كل ما باكتبها بالإنجليزى الكتابة بتبوظ ) واكتب فى المدونة।

وإليكم الفعاليات الهامة

أول فعالية تاريخية ومفصلية وفيصلية برضه هى

تكوين اتحاد الثقب الحر من زوجات شلة الثقب الأسود

التفاصيل

• لقيت مراتى بتقوللى


• احنا اتفقنا نجمع زوجات الثقب وهانفطر يوم الاتنين هنا في البيت
  
  من نفسكوا كدة؟


• أيوة اشمعنا انتو
• 
  
  ومين بقى صاحب الفكرة العظيمة ده؟


• مرات إسلام
• ومين اللى هاييجى؟
• 
  
  كلللللهم
• 
  
  يابنت اللذينة وعرفتوا تجمعوهم كلهم؟
• 
  
  أيوة
• 
  
  وخطيبة قصاص؟
• أيوة
• 
  الله دانتوا ناويين لنا على نية بقى؟ ...........(صمت)
  
  أما بقيت التفاصيل فلقيتها مش عايزة تقولهالى أوى يظهر إنهم عايزين يشعروا بالاستقلالية والـ... الـ...الـ...حاجة كدة مش عارف اسمها ايه.
  وطبعا إنهم يقدروا يجمعوا كل الزوجات ده حاجة غريبة جدا لأن زوجاتنا مختلفين نوعا ما فى حاجات كتير فده معناها إنهم مركزين.
  المهم يا معلم ربك والحق أنا قلقت وطبعا كل اللى أقوللـه من أفراد الثقب يقلق زيي ويقعد يسألنى همه ناويين على إيه........إوعى يكون هايعملوا إتحاد الثقب الحر... دول جايبين خطيبة قصاص كمان يانهار اسوح من أولها...
  طبعا الرجالة مقتنعة بمنطق (فرق تسُد) ولأن عشان مش كل زوجات الثقب أصدقاء فكان الرجالة بيعرفوا يظبطوا أمورهم إنما المسألة كده هاتكون أصعب كتير وبينى وبينك هى برضه ليها شوية مميزات।

الفعالية الأهم

قصاص هايكتب كتابه يا رجاله

طبعا الموضوع ده عايزله تدوينة لأ قول تدوينات إنما هانذكره دالوقتى عالسريع لغاية ما نرجعله بعد كدة بالبحث والتنقيب والتحليل (دم ولا بول ...ها ها ها ..وحشة موووت)
المهم إن الأب الروحى لشلة الثقب الأسود هايتجوز ويطب فى الخية وهايدخل برجليه القفص اللى بيقولوا عليه ذهبى (مش عارف مين اللى ذهّبه) وطبعا ده حدث تنظروا الأمة بأسرها ونحن إذ نتقدم بخالص و أرق التعاز...التهانى لأخينا وملهمنا الروحى القصاص (كاتر) على هذه الخطوة التى طالما انتظرتها جماهير المنتخــ....جماهير الثقب الموحد الأعظم وسمعنى سلام العظيم سعد الصغير فى راعئته الخالدة
"أنا خلاص هاتجوز وابطل اقضيها اشتغالات ....هاتجوز...هاتجوز"
وعظيمة يا ....صفط

الفعالية الثالثة
"باسم التوربينى" الشهير بـ "باسم الشربينى" عازمنا

على عقيقة إبنه فى العيد فى المنصورة

عرفت من يومين إن باسم جاى مصر وعازمنا فى العيد على عقيقة إبنه (يا بتوع العربى هى كلمة "إبن" همزة وصل ولا قطع يعنى بتتكتب ولا لأ؟؟)فى المنصورة وده الحقيقة بتبقى فرصة عظيمة لكذا حاجة طبعا أكلة جامدة وتغب فيها حتى الثمالة من غير ماحد يقوللك تلت التلاتة كام ,ثانيا صحبة حلوة يوم كامل وتهييس بقى ايه ما اقوللكش,ثالثا وده الأهم نتحصل على ثواب إجابة الدعوة يا أخى فى الله ان شاء الله
وبهذه المناسبة الميمونة نتقدم للعضو التوربينى (اللى واخد تفرغ من الثقب لظروف سفره من كام شهر) بخالص التهانى وبأرق الـ..أي حاجة ودعائنا جميعا للخروف اللى هانطحن أهله إن شاء الله بحلاوة لحمته وزيادة وزنه وبالصبر والسلوان والسلام عليكم.



انتظروا قريبا
مسايقة أفضل" لوجو" للثقب الأسود

الثقب الأسود كيف ولماذا؟

بالمناسبة هوليه "أسود"!!؟؟؟
قهوة "أبو أمين" شاهد على العصر
أرجوزة ...قصة على الطريق الصحراوى.
بلبع فى القلب
لماذا اختفى الأهوجى "على علبة" ولمذا عادأهى المؤامرة أم المصادفة..؟
حكايتنا مع السينما
الإسكندرية... حكاية عشق
تمن سودانى وتمن لب أبيض وتمن لب سوبر بسررررعة
القصااااااص...... للجميييييع
دليل الثقب الأسود للمطاعم المعتمدة رسميا بالقاهرة والإسكتدرية

سلسلة محاضرات "أدبيات الثقب الأسود"

بالمناسبة اللى عايز فيكوا يكتب فى موضوع من دول ياخد من العبد الفقير المدوناتى الجامد أو من "سولى" الباسوورد ويتفضل ينزل أرض المعركة ويورينى نفسه وفارس لفارس وكى بورد لكي بورد بس لو حد سولتله نفسه الأمارة بالسوء أو إبليس اللعين إنه يحذف كلمة م اللى أنا كاتبهاهاعوره مفهوم يا ثقب ؟ ...مفهوم ؟ أيوة كدة افتكرت।آل أرجوزة آل

إلى اللقاء فى التدوينة الجاية أراكم فى التعليقات.

مصطفى